علنت اسرائيل ضم الحرم الابراهيمى "فى مدينة الخليل الفلسطينية" و قبر راحيل زوجة سيدنا يعقوب عليه السلام و مسجد بلال بن رباح الى لائحة المواقع الاثرية اليهودية
و دة ليه كذا معنى
اول حاجة انهم حيطمسوا اى حاجة اسلامية فى المقدسات دى و حيغيروا ملامحها و حتبقا يهودية
تانى حاجة ان دى هى الخطوة الاولى بس و الخطوة التانية انهم يعلنوا ضم المسجد الاقصى و يهدموه و يحطو الهيكل الظريف بتاعهم
الحرم الابراهيمى دة رابع اهم مسجد فى العالم بعد الحرم المكى و الحرم النبوى و المسجد الأقصى
و يضم أضرحة سيدنا ابراهيم "خليل الله" و سيدنا اسحق و سيدنا يعقوب عليهم السلام و زوجاتهم
عن أبى هريرة أنه قال: قال رسول الله صلى الله عليه وسلم «لما أسرى بى إلى بيت المقدس مر بى جبريل على قبر إبراهيم، فقال: انزل فصل ركعتين، فإن هنا قبر أبيك إبراهيم ثم مر بى على بيت لحم وقال: انزل فصل ركعتين فإن هنا ولد أخوك عيسى، ثم أتى بى إلى الصخرة
يعنى غالبا الرسول عليه الصلاة و السلام صلى هناك فى الاسراء و المعراج
بجد يا جماعة اللى حاصل دة مصيبة كبيرة احنا مش حاسين يعنى ايه يضموا رابع اهم مسجد فى العالم كأنه اثر يهودى ازاااااااااى يعنى؟؟
و على فكرة لسة من كام يوم كدة اغتالوا واحد فلسطينى بطريقة قذرة جدا جدا جداااا و كلها غدر و محدش اتحرك و لا كأنه ليه اى علاقة بينا
انا بجد مستغرب احنا ازاى نايمين كدة؟؟؟؟؟؟؟
كأن اسرائيل لما بتعمل كدة كأنها بتأذى دين تانى يعنى كأن المساجد دى و الأقصى اللى بقالهم فترة بيهدمو فيه مش حاجات اسلامية خالص
انا بوجه الكلام ليكو و لنفسى كمان ازاى احنا ضعفاء كدة؟
بجد لازم نتحرك و نعمل أى حاجة
الناس دى اكتر حاجة بتوجعها و بتحركها الاقتصاد ...... ليه منتفقش كلنا عالمقاطعة لمدة شهر على الاقل حتى؟
نحدد معاد لبداية المقاطعة دى عشان كلنا نبدأ مع بعض و ننشر الموضوع دة انا متأكد اننا نقدر نعمل دة
قال رسول الله صلى الله عليه وسلم:
(توشك ان تداعى عليكم الامم كما تداعى الاكلة الى قصعتها) قيل (اومن قلة نحن يومئذ؟) قال (بل انتم كثير ولكن كغثاء السيل ويوشك الله ان ينزعن المهابة من صدور اعداءكم وان يقذف فى قلوبكم الوهن) قيل (وما الوهن؟) قال (حب الدنيا وكراهية الموت)
بقى احنا الجيل دة؟
بقى عايزين نعيش و نموت كدة؟
ممكن نبقا الجيل اللى يتم فيه هدم المسجد الأقصى لا قدر الله؟
مع العلم ان اليهود لما ضموا الحرم الابراهيمى و هما طبعا عرفين انه يلى الأقصى فى الاهمية عند المسلمين اكيد عايزين يختبروا المسلمين و يشوفو رد الفعل حيكون ايه عشان يحضرو للخطوة الجاية انهم ياخدو الأقصى
قذف الله فى قلوبنا الوهن و حب الدنيا؟
بقا حب ماكدونالدز و كنتاكى و كوكاكولا عندنا أهم من المسجد الأقصى؟
من فضلكم فيه كام كلمة كدة مش عايز اقراها و اللى عايز يقولهم يا ريت ميردش عالتوبيك احسن عشان مش طالبة خالص
محدش يقوللى ان دة شغل الحكومات
لأن الحكومات دى مش بتحكم "أنعام" مثلا لأ كل شعب فى الدنيا و كل انسان لوحده يقدر يعمل حاجة بس احنا مكسلين او يائسين او معندناش الهمة و العزيمة او زى ما رسولنا الكريم عليه الصلاة و السلام قال الوهن ملأ قلوبنا
احنا نقدر نقاطع دى حاجة فى ايدنا مش فى ايد الحكومة و نقدر نصوم يوم جماعى مع بعض و ندعى عشان دعواتنا تبقا موحدة و طبعا نقدر نتظاهر و نقدر ننشر القضية دى لكل انسان عشان الكل يشتغل فى وقت واحد متبقاش جهودنا فردية
و محدش يقول لو انا عملت غيرى مش حيعمل
لأن لو غيرك غلط دة مش عذر ليك انك تكون غلط و بعدين ربنا حيحاسبك لوحدك و حتى لو انت لوحدك بس اشتغلت و شغلك مجابش اى نتيجة بسبب تخاذل غيرك على الاقل تبقا اخدت ثواب و تبقا عملت اللى عليك و لما ربنا يسألك عملت ايه لنصرة دينك تبقا عملت حاجة
و بعدين انا متأكد ان كلنا بنتألم جدا و بنتقطع لما نفكر فى الموضوع دة , طيب ليه عايزين نتوجع و بس؟ ليه مش عايزين نعمل حاجة على الاقل النار اللى جوانا تهدا شوية
و محدش يقول مش لما ابقا اعمل فروض دينى الاول و ابطل اعصى ربنا و انتظم فى الصلاة
لو قلنا كدة بقا يبقا عمر ما حد حيعمل حاجة فى حياتنا كلها اصلا ,مش يمكن دة يغفرلك دة؟ و مش يمكن دة يبقا بداية الطريق؟
و بعدين احنا عايزين كل الناس معانا يعنى حتى لو مش متدين اوى لأن كل اللى احنا عايزينو صيام و دعاء و مقاطعة و دى حاجات كلنا نقدر عليها بس عايزين نتفق على كدة أدام ربنا عشان العمل الجماعى احسن
